’t Is maar wat in disse stad
· leestijd 1 minuut AlgemeenZakt in de geute, kreeg ik mien toch veurige weke een merakels mooi blad in de busse, ‘t istorisch tiedschrift van historische vereniging ”Jan van Arkel”. Dubbel en dwars de muuite weerd um te leezn, leden kriegn ’t zo, maar ’t is ook te koop in de boek’andel. De geskiedenis van de bruune vloot met prachtige foto’s, een indringend ver’aal over een foute pliesie commissaris en een foute burgemeester in Kampen in de oorlog.
En tot slot noa anleiding van ’t ofskeid van onze burgemeester Bort Koelewijn een ver’aal van twee goeie burgemeesters uut de periode van de fusie tussen Kampen en Iesselmuudn, Henk Kleemans en Mark Markusse, die intussn 84 en 79 joar old bin. Alle beidn een mooi ver’aal over ‘un belevenissn in ‘un burgemeesters periode in Kampen en Iesselmuudn.
Ik kan ’t tiedskrift veur iedere rechtgeaarde Kampenaar en Iesselmuudeger van ‘arte an beveeln. Een poosien geleedn toen zeeg ik in mien stukkien det wi’j vrogger noa de bakker e stuurd wiern um een ‘alf kemiesien te ‘aaln, en doar kreeg ik een paar reaksies op, met de vroage wat now eigenli’jk een kemiesien was.
Ik bin ies op informasie uut e goan bi’j een olde bakker en kreeg ’t volgende antwoord, ’t deeg wat an e maakt wier met melk det was melkwit, en ’t deeg wat an e maakt wier met water det was kemies, ’t was wat gries van kleur en een bietien goedkoper as ’t andere brood, en zo ziej maar weer een mense is nooit te old um te leern.
’t Zelfde geld toen ik ’t ad over de Peere zien gang, een smal steegien in de ‘Ellegesteege’, met de vroage oe koom ie doar bi’j, now ’t zit als volgt, d’r vestigdn zich een man uut Deurne in Kampen in de Ellegesteege “John Baptiste van der Perre”, die een tuinderi’jgien begun achterin de tuin.
En det was netuurli’jk een niet uut te spreekn name veur de buurn in de Ellegesteege en ’t duurdn niet zolange of John werd Jan, en van der Perre werd de Peere, dus ’t werd “Jan de Peere”.
En det smalle steegien noast zien ‘uus wier een gang e nuumd, en zo werd ’t in de volksmond “de Peere zien Gang”.
De meuln bruuge die lag d’r uut, now det em we e weetn, wat een gigantische puin’oop, en veural an de Iesselkante, ofgeloopn vri’jdag um kwart over vijf toen kon ik an skoem achter an de Iesseldiek varre veurbi’j de boom ‘aamt, drie kwartier veur dak an de beurte was bi’j de langebrugge, en tot mien verbazing stunn an de Iesselmuudeger kante wel vier verkeers regelaars en an de kamper kante ‘elmoale niks.
Wie ‘ier verantwoordeli’jk veur was die ef zien ‘uuswark slecht e doan. En zo zie maar weer zo is d’r altied wel wat in disse stad.
Appien Floep
